我一直都有問 Carmen 會唔會整個瑜伽 studio? 佢次次都答”唔會” ！每次聽完我就笑一笑，自己都係過來人，明白做生意好困身：生意好就做到隻狗咁，生意差又要擔心交租問題。另一角度諗，我深信開 studio 係每一位瑜伽老師都會諗過嘅事。
2022 八月左右，carmen 失驚無神問我睇唔睇單位？第一個反應係呆咗！個單位好近我地，近到可以叫前鋪後居都不為過。就咁，八八卦卦咁一齊走去望下。冇期望就冇失望，點知睇完，我地兩條友都驚喜萬分，對個單位有非常大好感！
經驗告訴我，如果兩個人都有同一感覺，出嚟效果一定唔會死錯人。百發百中。
去馬！即日決定租！心諗，唔做瑜伽 studio 都可以玩個 man cave ，搞個攝影 studio 都仲可以。The next day 同業主 confirm ，落訂又依樣又嗰樣。例行公事搞完，即刻搵朋友搞裝修。
裝修個 design 就當然係金師傅一手包辦。自己全無氣質，只有一陣阿叔除！兩條友都認同應該要有個大大方方嘅 lounge area ，practice area 一定要用實木地板，唔要鏡，要簡單實在，唔要什麼花臣嘢，但又唔可以冇咗金師傅個人氣質。呢個時候，男人最好唔好出聲！
負責裝修位朋友同我地夾咗都好幾個 projects，絕對信得過！但點都好， shit happens! 原本諗住十月開波，最後都要 十一月先開到班。當時金師傅喺度練呼吸，好深好慢嘅呼吸，用 pranayama 去控制緊張心情。我估真係 work，因為佢好冷靜咁整緊個 Pranayoga 個 website 。
有日，carmen 又失驚無神話我知，佢唔想教咁多堂，收費唔想太貴，但價錢平又有可能令人覺得佢流 ! 如何是好？大家吹咗一陣，都認同教瑜伽，唔應該用太多商業角度去 run。哪，搞清楚，錢係要賺，但絕對唔可以貪。－定，絕對，肯定唔可以忘記瑜伽初心，you do what you preach。呢－點，真係無得呃，日久見人心。
Prana yoga 十一月終於開波。呢幾個月都算穩穩定定，不溫不火，求仁得仁。師傅話遲早我都要教，教人其實就係教自己。
好!!!! 就等佢開 Teacher Training！
For more info. visit: